الحل ايه ؟/ بقلمي/ عونى_هشام

الحل ايه ؟
======= عونى هشام
نفسى اداوى الجرح
وازرع فرح
مش لاقى المكان

نفسى اعيد البسمه
لو بالهمسه
 ونعيد اللى كان

نفسى اشوف الدنيا
بعيون تانيه
 ونعيش بالامان

نفسى نفسى ف نفسى
مش لاقى نفسى
 مش لاقى الحنان

نفسى اخرج بره
من ها الجره
 ونواجه الطوفان

ايه العمل فين الامل
الظرف صعب ما يحتمل
 مين السبب مين اللى خان

ابنى الشهيد كان ع الحدود
شايل معاه حلم الجدود
 الغدر صابه من الجبان

وابنى الصغير رافع علم
وسلاحه كراسه وقلم
 حلمه راح ومفيش مكان

ولامتى اداوى فى الجراح
كان عندى حلم لقيته راح
 وكأنى عايش فى العدم

اشوف بناة الاهرامات
اشوف عبور ف السبعينات
 اعيش ف حاله من الندم

احنا مين ورحنا فين
راح ضميرنا نسينا دين
 وبقينا نشحت م الامم

يا ارض يوسف والمسيح
يا ارض موسى والنبى
 والنبى نشد الهمم

فى ناس كتير ملهاش تاريخ
اليوم تسابق اى ريح
واحنا ما نحرك قدم

الحل فينا وكله غافل عنه ليه
راح الضمير ومعدش خير
 وعقولنا مزروعه ف صنم

الحل ايه
-------
#عونى_هشام