( فتنة )/ كلمات / محمد فتحى

( فتنة )

فى بداية حروفى و كلماتى
من أول شطرة فى القصيدة
مصر بلدى و روحى و حياتى
 هتفضل طول العمر شديدة

ياريت يا فتنة متحاوليش
تهدى مصر المحروسة
أصل المحبة هتعيش
 غصب عنك يا مدسوسة

هتفضل مصر منصورة
مش هتعرفى تكسريها
لو فكرتى تخليها مكسورة
 يبقى حياتك هتخسريها

متفكريش انك قدنا
احنا جبال اسود
مهما تيجى ضدنا
 اخرك طريق مسدود

فى كل كتاب ملعونة
يالى انتى اسمك فتنة
مهما اندفع فيكى معونة
 مش هتهزى مصر بيتنا

انتى اساس الدم
بقولها بعلو الصوت
امتى سمك يتلم
 امتى بقى يموت

مهما على صوتك
لا هنضعف ولا هنسلم
ولا هيهزنا ابدا جباروتك
 محدش على مصر بيعلم

مهما كانت قوة شرك
عمره ابدا ما هيأثر فينا
ولا هنرسى على برك
 انا و اخويا مينا

لو تملى نارك متقادة
احنا أقوى من الريح
اتعلمنا المحبة بزيادة
 من سيدنا النبى و المسيح

بلدى دايما شادة حيلها
مش ممكن ابدا تميل
ببركة قرأنها و انجيلها
 مش هتركع مستحيل

كلمات : محمد فتحى