تحذير ... بقلم / صبري علي

تحذير ... بقلم / صبري علي

……………………

(1)

إوعى تقول لى:" باحبّك" تانى ..

إوعى تقول انّك  ...... مشتاق .

أنا قرّرت ...... أعيش وحداني ..

وأقول أهلا بيك .....   يا فراق .

إتسممت خلاص  ...من غدرك .

أملى البعد  ..... يكون ترياق .!

أنا م اليوم ده ... هاحذّر قلبى ..

وهاقول له ..... يبطّل أشواق .

وهاقول له ' يبطأ دقاته. .!

وكإنّه ف حالة ...إغماء .!

إوعى تقول لى:"باحبّك" تانى ..

إوعى تقول انّك ...... مشتاق .

(2)

إوعى تفكّر إنّى أصالحك ..

ولّا أسامحك .... زىّ زمان .

وكلّ ما تكتب جملة' احفظها ..

وأردّدها ف سرّى .... كمان .!

اوعى تفكّر  ...كلمة تقولها  ..

بسّ بلوعة, وشوق, وحنان .!

هاتنسّينى ' مرارة جرحك ..

وارجع احبّ, وادوب, واشتاق .!

اوعى تقول لى:"باحبّك"تانى ..

اوعى تقول ...... انّك مشتاق .

(3)

إوعى تفكّر ... تبعت رنّة ..

أو تتكلمّ .... فى التليفون .

أو توعدنى كمان بالجنّة ..

واحصد نار مع خوف, وظنون .

ياما وفّيت 'علشان تتهنّى ..

وعمرى ما فكّرت انّى أخون .

ليه بدّلت .. العشق خيانة .?

ومقدّرتش .....  أىّ وفاء .?

إوعى تقول لى:"باحبّك" تانى ..

إوعى تقول ...... انّك مشتاق .

(4)

إوعى تفكّر  ... يوم تقابلنى ..

إوعى توسّط بيننّا' صحاب .

ولّا أشوفك, ولّا تشوفنى ..

عمرنا ما هنرجع أحباب .

أو تتحايل, أو تتمايل ..

أو تبعت لبريدى ' جواب .

ولّا تقول لى:"دى آخر فرصة" .

لأ ' أرجوك ' بزيادة عذاب ..

سيب لى انا فرصة'اداوى جروحى..

وابعد عن  .......... درب العشّاق .!

إوعى تقول لى:"باحبك تانى" ..

إوعى تقول .................... انّك مشتاق .