هوه انتي ليه كل اما اقرب تهربي؟ /بقلمي / مجدي احمد محمد

هوه انتي ليه كل اما اقرب تهربي؟
الخوف دا مني وللا خايفه تجربي
سيبي العواطف والاحاسيس تلتهب
خليها توصل حتي حد الانفجار
ساعتها يمكن تعرفي تاخدي القرار

هوه احنا ليه خلينا بس الحب نار
وبننسي حلاوته ونفتكر بس المرار
دا الحب جنه
وحتي ناره احلي جنه
وشوكه يجرح
بس ريحته تمر حنه
وليله قاسي
لما يمر سنه سنه
لكن بننسي اول ما يهل النهار

هوه اللى يحلي الحب إيه؟
غير حبه جنه وحبه نار
دا مافيش حلاوه ياحلوه طلعت
غير م العسل والنار
الله عليها لحظة لقا بين الحبايب
مع شوق بيعزف بانتصار
بس انتي حاولي
وحاولي تاني وجربي
وبلاش ياحلوه
كل اما اقرب تهربي
وبوعدك
انا حاسعدك
ياشمس وانتي مروحه أخر النهار
مش حترضي تروحي
وحتوصلي الليل بالنهار
 وساعتها يمكن تعرفي تاخدي القرار

بقلمي \ مجدي احمد محمد